潮玩科技——
手機商競爭對用家有利

2012-08-31

擾攘超過一年、兩大電子巨頭Apple對Samsung就侵權案件第一回合終於有結果，美國加州法院裁定Apple勝訴，Samsung將要賠十點五億俾蘋果之餘，有唔少產品喺美國仲要禁售。相信Samsung唔會就咁罷休，應該都會上訴，睇嚟就有排打。

        到底Samsung有無抄Apple？應該由法庭同觀眾評論，科豆無乜意見；只係案件肯定影響到Samsung之後嘅產品設計同公佈。我同你呢啲升斗市民最關心嘅，自然係Samsung另一重量級作品GalaxyNote2會唔會如期發售。

        其實Samsung近呢一兩年來嘅起飛，大家都有目共睹，特別係Android市場上，基本上係贏其他對手一條街。Animoca網站最近公佈亞洲幾個主要地方Android手機嘅市場佔有率，基本上除日本外，通通都係Samsung嘅天下，香港嘅Top5Android手機更加全部係Samsung旗下。講真，唔出奇啊，早兩年你搭車見到一街都係iPhone，到咗今日就一街都係Samsung，都咪話唔犀利。

        至 於今次官司事件對Samsung手機嘅銷情有咩影響，暫時仲係未知之數；不過所謂亂世造英雄，其他Android品牌例如Sony同HTC會唔會因為Samsung呢一次嘅挫敗而食住個勢而起，Nokia又會唔會因為WindowsPhone8而東山再起，確實好難講。

        其實從用家角度諗，手機廠商們多競爭係好事，但只限於產品研發，告嚟告去其實對我哋呢啲用家無乜得着，不如早日搞掂單官司、諗多啲新橋新產品俾我哋用仲好喇！

        科豆