數碼電台瀕清盤 鄭經翰：月尾冇糧出
(2012年08月03日)

由「大班」鄭經翰牽頭的香港數碼廣播電台(DBC)，因部分股東拒絕注資而鬧分歧，本身是政協委員的大股東黃楚標，早前曾向傳媒指鄭經翰經營不善，鄭經翰在接受本報訪問時反指對方所言是廢話，他相信事件完全是政治打壓，更指中聯辦指令黃楚標不能向他出售股權，目的是迫使DBC走上清盤之路，他不諱言「月尾冇糧出」，但他正垂死掙扎，希望力保電台繼續營運不會被滅聲。 DBC自一周前傳出因資金問題爆發內訌後，黃楚標與鄭經翰連日隔空對罵，雙方各執一詞，黃楚標更以律師信與鄭經翰「溝通」，雙方關係已近勢成水火。據悉，黃楚標更已委聘資深大律師馮華健隨時準備打官司，鄭經翰直言，「股東來往用律師信，感覺不好」，但他不諱言大家也已作部署，最終可能對簿公堂。鄭經翰作好應戰準備，但黃楚標昨日再發出律師信要求查數，鄭經翰指現時面對法律責任及金錢壓力，承認獨力難支，坦言「真係月尾冇糧出！」 股東角力黃楚標拒售股 對於黃楚標以公司不賺錢及經營不善為理由拒絕注資，鄭經翰反駁黃楚標的講法，指公司完全跟足業務計劃，目前營運7個台的每月皮費只500萬元，並指前景大有可為，預期1年內可收支平衡，「所以一定唔係商業(原因)」。他指黃楚標、李國寶、李國章及黃子欣4名佔逾五成股權的股東，拒絕按協議再注資5千萬元，若在商言商，他們可出售股權、買入其他股東股權、甚或引入外來資金，「但佢哋唔肯，只叫執咗佢………」鄭經翰一方曾提議自行注資，「但佢哋唔鍾意俾你dilute(攤薄)，話容乜易第日俾你攤薄到零，根本講到冇道理………」 黃楚標於周三發出律師信，指由於股東未能通過注資決議，公司因缺乏足夠資金而將倒閉，所有資金只能用作支付員工薪酬及遣散費，並指公司行將結束，不能再作任何業務，否則有欺詐之嫌。鄭經翰指這等同要電台不能接廣告，「即係唔俾電台做生意，想陰乾我哋，佢哋立心不良！」 鄭經翰相信今次事件是政治打壓，肇因是犯了數個大忌，「因為『復仇者聯盟』，我搵晒黃毓民、尤其最大鑊係吳志森，佢哋咁辛苦先封佢咪，我俾佢開番咪；最慘我開咪後對梁振英製造咗威脅………」他續說，「梁振英想封我咪係第二次，第一次唐英年(喺特首選舉論壇)已講出嚟，今次故技重施，係political(政治)問題，唔好聽佢(黃楚標)噏話咩生意呀、唔掂呀，多餘，佢commit(承諾)咗6億㗎攞牌時………」 個人已投資3,700萬元的鄭經翰，原來構思是希望DBC將來可成為真正的民間電台，由市民支持，不受政治及經濟壓力，但事與願違，他指被政治打壓比想像中來得快且狼，「佢哋要買起我哋，迫走我哋，收嚟做政府喉舌……」他指幕後黑手是中聯辦，「我肯買黃楚標(股權)，但佢(黃楚標)話中聯辦叫佢唔准賣俾我，講到明，中聯辦話咗冇得賣………」 氣言再移民加拿大 鄭經翰直言「條氣唔順」，更一度發晦氣說會再移民回加拿大，「共產黨話封咪就封咪，呢個世界仲有公義？香港唔使住㗎啦，如果呢單嘢係咁，我返加拿大………」他坦言感到唏噓，但表明不會投降。 若DBC最終被迫清盤，鄭坦言感到可惜，但不會坐以待斃，「一邊迫你(我)死，大石砸死蟹，我就垂死掙扎，睇下點可以保得住電台。」他形容現時處境是迫虎跳牆，至於下一步做法，「兵來將擋，搵律師，同埋可以點維持落去，依家睇市民係咪支持。」有聽眾建議電台收取月費，亦有聽眾獻計以100元賣小廣告，希望集腋成裘協助DBC繼續營運。本報昨日未能聯絡黃楚標回應。