黃天賜 都市博客 3322
2012年07月27日,星期五


文憑試放榜，大家都被數字、星星弄得糊塗，學生、老師都要「估估吓」，且看聯招放榜後，幾人歡喜幾人愁。

「43322，44432，53322」過去一星期聽得最多的便是這堆數字。新高中文憑試放榜當天，第一個接聽的是姊姊來電，告知外甥的考試成績，由於外甥已有心理準備，早已報讀一些有興趣的副學士課程，成績也符合取錄標準，對我來說，鬆一口氣，因為一直憂心他連副學士的資格也不達標。
未幾，電話再響，一位朋友來電說，他的姨甥女考獲544432，想報浸大的新聞，問我是否達標。告訴他，浸大新聞改了學院制收生，按學院的要求，她是達標，是否取錄，要看有多少人報名，成績是否較她更佳，正所謂：「水漲船高。」聽罷，他回應：「哪不是聽天由命？！」
不出一小時，電話又響起，一位教中學的師妹來電，問的是同一內容：「我學生攞到444332，有無機會入浸大新聞？」我說：「浸大新學制改了學院收生，按開出的條件，當然符合，但一個5都無，會唔會有啲風險？」她問：「風險有幾大？」呆了！「誰知道？況且是第一年新高中文憑試，又是學系第一年改學院制，明年啦，明年可能有參考數字。」
師妹聽了，嘆了口氣：「原本一開始聽到學生拿3個4都幾開心，點知後來知道DSE的4只相等於高考的D，就開始擔心，仲話有兩萬六人有3322，一萬二人有5條4，睇怕無4444都唔使入大學？」我說：「新學制加上新考制，大家都唔知。」師妹感慨：「今年真係白老鼠，咩都無得參考，都唔知點建議學生去填聯招。一係博；一係唔博，如果博啲收生要求高嘅科，怕唔夠人爭，如果報啲水泡科，學生可能要讀啲無興趣課程，而且仲要讀四年，今次真係博又死，唔博又死。」
我說：「咁不如興趣行先！」師妹最終決定：「都係叫個學生轉啲水泡科，安全啲，唔係到時連資助學位都無埋，仲慘。」我不敢再多說，打個圓場作罷。
兩天後，與一位任教私立大專院校的友人飯敘，打趣說：「你哋就好喇！聽講收生收到手軟。」友人沒好氣回應：「係呀，仲有好多學生有星星。」「咁好？真係可喜可賀！」「有咩好賀，我面試見到佢地啲成績單，有啲成績5星都嚟，心諗『使唔使呀』，都知道佢哋想搵個水泡，聯招公布，必走，但論成績，都要照收，所以，表面上好似收咗好多學生，但聯招放榜後，恐怕剩番一半都冇。」：「咁點算？」他說：「收多啲，預佢走。」「如果到時無你哋估計咁多人走呢？」「咁又係死，到時學生太多，要開多幾班，唔夠老師，又係死！」
文憑試放榜，大家都被數字、星星弄得糊塗，學生、老師都要「估估吓」，且看聯招放榜後，幾人歡喜幾人愁，屆時便可知道3條5代表甚麼，星星又是甚麼？寫到這裏，我已滿天星星。

黃天賜
香港浸會大學新聞系講師
wtinchi2002@yahoo.com.hk